關於
VERITA
VERITA 嚟自拉丁文 veritas——真實。我哋起呢個名，係因為喺一個到處都講「包 claim 足」嘅行業入面，講真話反而係最難嘅事。
我哋嘅第一條服務線係脫疣。之後會擴展到其他醫學美容療程，但無論做邊樣，四條承諾都一樣適用。
01
我哋唔會做嘅四件事
唔會 / 01
唔會講「包你 claim 到」
賠唔賠、賠幾多，係保險公司按你張保單同醫療需要決定嘅，唔係我哋。任何人同你講包賠，你應該即刻走。
唔會 / 02
唔會誇大你嘅病情
疣係病毒感染，但佢唔係絕症。我哋會照實話你知你嘅情況有幾嚴重、或者其實幾唔嚴重。
唔會 / 03
唔會現場加單
檢查完先報價，報咗價就唔改。躺低咗先話你知「其實仲有十幾粒」呢種事，喺度唔會發生。
唔會 / 04
唔會喺你做緊療程時推銷
你入嚟做脫疣，就只做脫疣。其他療程嘅資料，你想要先會俾你。
02
療程喺邊度進行？
所有 CO2 激光脫疣療程，均喺香港持牌日間醫療中心內、由香港註冊醫生親自操作。護理由註冊護士負責。
如果你希望由女醫生處理，預約時講低，我哋會按醫生當日排期安排。任何情況下，激光療程都唔會由非醫生人員操作。
03
常見問題
- 點解你哋唔敢講包 claim？
- 因為無人可以。賠償由保險公司按你嘅保單條款、醫療需要，以及「合理及慣常收費」原則審批。任何機構同你講包賠，佢其實喺度講一件佢控制唔到嘅事。
- 如果我純粹覺得唔好睇，想剷走佢，得唔得？
- 可以，你有權自費做。但要明白：如果醫生喺病歷上記錄嘅係外觀原因，保險公司好大機會會歸入美容除外責任。呢個情況我哋會事先講清楚，唔會扮唔知。
- 有無女醫生？
- 有。預約時講低你嘅要求，我哋會按醫生當日排期安排。所有 CO2 激光療程一律由註冊醫生親自操作。
- 做完會唔會留印？
- 會有結痂，一般一至兩星期脫落。之後新生皮膚較幼嫩，如果曬到太陽好容易色素沉澱（反黑）。嚴格防曬同唔好搣焦，係決定會唔會留印嘅關鍵。
- 會唔會復發？
- 疣由 HPV 病毒引起，即使清除咗，同一位置或其他位置都有機會再出現，亦可能經共用物品再感染。所以我哋包一個月內補打一次，亦會同你講點減低再感染風險。
- 你哋仲有做其他療程？
- 有，但唔會喺你做脫疣嗰陣推銷。如果你想了解，可以自己問。我哋寧願你隔一排諗清楚先返嚟。